ဖုတ်တာကြာတော့ တင်းလာတယ်
ရှုပ်တာကြာတော့ ရှင်းလာတယ်
ပြောစရာ မရှိတဲ့ အကြောင်းကိုက
ပြောစရာ ဖြစ်နေတယ်။
အီရတ်မှာ၊ အာဖဂန်မှာ
ကမ္ဘာအေးမှာ ၊ ဖက်ဖူးရောင်မှာ
တိုက်ပွဲသံတွေ ထန်ပြင်းလာပြီ။
ရန်ကုန်မြို့ကြီးသည်လည်း
အင်ဂျင်သံတွေ တဂျုံးဂျုံး တဂျိန်းဂျိန်းနဲ့
ပုံနှိပ်စက်က စာရွက်တွေ ထွက်သလို
တရွက်ပြီး တရွက်
တခွက်ပြီး တခွက်
အကြောင်းအရာက စုံတယ်
ဒေါ်စုကြည်နဲ့ ဦးအောင်ကြည် တွေ့တာကနေ
ခြေရင်းအိမ်က ကြွက် အဆမတန်ကြီးတာထိပါတယ်
“မ” ရဲ့ နဖူးလေး လှတာကနေ
“မ” ရဲ့ ထမီစကပ်ရောင်စုံလေးတွေ အထိပါတယ်
ဗုဒ္ဒ၀င်ပါတယ်
ကဗျာယဉ်ကျေးမှု ပါတယ်
နိုက်ကလပ် ယဉ်ကျေးမှု ပါတယ်
ကျေးဇူးတင်လွှာတွေ ပါတယ်
ဝမ်းနည်းကြောင်းတွေ ပါတယ်
ကြေငြာတွေ ပါတယ်
မပါတဲ့ အရာတွေလည်း ပါတယ်။
ဘာတွေပဲပါပါ
နောက်ဆုံးမှာတော့
နောက်ဆုံးသတင်းဟာ ပါတာပါပဲလို့
ကောက်ချက်ချလိုက်မိတော့
ခွက်ထဲက “ကျစိမ့်”ကိုပဲ
အရသာခံပြီး ဇိမ်ယူလိုက်ကြတော့တယ်။ ။
ထွန်းနွယ်
(၁၇.၁၀.၀၉)
No comments:
Post a Comment